DOCUMENTO: CRISTOBAL DE SOTOMAYOR ( AÑO 1510 )(II).

Orden de pago a favor de don Cristóbal de Sotomayor por el Rey al tesorero
Ochoa de Landa. Madrid, 2 de noviembre de 1510. 

[AGS. CYRS. L.14, 10]

El Rey / Thesorero Ochoa de Landa por parte de don Xpoual de Sotomayor me es fecha rrelaçion diziendo / que en vos les estan librados en las nominas que yo mande dar del terçio postrero del año pasado / de quinientos e nueve años de los criados e ofiçiales de la Casa de la Serenisima Reyna Joana mi muy / cara e muy amada hija çiertas contias de maravedis de su quitaçion e ayuda de costa y que a cabsa / que las personas en cuya presençia 


Yo mande que se fiziesen las pagas de las dichas nominas / estan en Tordesyllas dezis que syn que sean presentes a la paga no lo podeys pagar y porque al dicho / don Xpoual no rresçiba dilaçion en la paga,

 Yo vos mando que deys e pagueys al ---dicho / Xpoual o quien su poder oviere los marauedis que por las dichas nominas oviere de aver en presençia /
de Andres de Ondarça e tomad fee suya de como en su presençia se los pagastes. Con la qual / e con esta doy por bien pagados como sy se pagasen en presençia de las personas en las dichas / nominas contenidas. E no fagades ende al. 

Fecha en la villa de Madrid a doss / dyas del mes de nobienbre de mill e quinientos e diez años. 

Yo El Rey. / por mandado de Su Alteza[rubricado] /

 para que Ochoa de Landa pague los marauedis que le estan librados en el a don Xpoual de Sotomayor en presençia de Ondarça / porque las personas en cuya presençia se avian de fazer las pagas de las nominas estan en Tordesillas. / [f.v.] 

   Yo Andres de Ondarça doy fee que el thesorero Ochoa de Landa pago / a don Diego de Sotomayor por virtud del poder que tenia de don / Xpoual su hermano los veynte mill e ochoçientos e nouenta e ocho marauedis que le fueron librados por las nominas que en esta çedula de Su Alteza / faze mençion las quales le pago en dineros contados e porque es verdad / firme esta fe (* fe) de mi nonbre que es fecha en Madrid a quatro de nobienbre / de quinientos e diez años. 

Andres de Ondarça. [rubricado] /


                                           FUENTE:

             Vida y desventura de un letrado gallego, Don Cristóbal de Sotomayor ,de Secretario Real a Alcalde Mayor en Yndias

                               István Szászdi León-Borja

                                Universidad de Valladolid